Xatirə Fərəcli - Şeirlər

"Sənin səadətin mənəm" kitabının elektron versiyası

"Sənin səadətin mənəm" şeirlər kitabını indi elektron kitab kimi PDF formatında yükləyə bilərsiniz

Açar sözlər: elektron-kitab sevgi şeir şeirlər-kitabı kitab

Yazar: Xatirə Fərəcli | Tarix: İyun 28, 2008 22:43 | Bölməsiz | Şərhlər(19) | Baxış sayı: 254

SƏNİN SƏADƏTİN MƏNƏM

Qəmə məhkum bu ömrümü
Kəsmə, ay Allah bəndəsi,
Yolum üstə külək olub
Əsmə, ay Allah bəndəsi.

Bu dünya bir uçuq kaha,
Ümid yox gələn sabaha
Küssən barışmaram daha
Küsmə, ay Allah bəndəsi.

Bir yollardır, bir pəncərəm
Gözləyirəm gözləri nəm.
Sənin səadətin mənəm
Gəzmə, ay Allah bəndəsi.

Açar sözlər: səadət xoşbəxtlik sevgi məhəbbət intizar

Yazar: Xatirə Fərəcli | Tarix: İyun 1, 2008 21:18 | Bölməsiz | Şərhlər(0) | Baxış sayı: 96

NİYƏ GƏLMƏDİN

Gözüm uzaqlara dikildi, gülüm,
Yolumda tikanlar əkildi, gülüm.
Gecələr yuxum da çəkildi, gülüm,
Sən niyə gəlmədin, niyə gəlmədin.

Mənim ki, yükümü başdan əyiblər,
Eşqimi bəxtimə qul eləyiblər,
Hamının gedəni gəlsin deyiblər,
Sən niyə gəlmədin, niyə gəlmədin.

Açar sözlər: xatirə fərəcli sevgi həsrət intizar

Yazar: Xatirə Fərəcli | Tarix: İyun 1, 2008 21:17 | Bölməsiz | Şərhlər(2) | Baxış sayı: 125

İÇİNDƏ

Soruşma halımı gendən-yaxından
Günlərim bombozdur duman içində
Ürəyin deyəni dilin demədi
Mən səni itirdim yalan içində.

Dağ qoyub getdiyin indi təpədir
Sellər, sular yuyur, yellər tərpədir.
Qəlbim oyuq-oyuq, qəlpə-qəlpədir
Boşuna gözlədim güman içində.

Dönmüşəm bir gizli nisgilə, aha
Mənə yazı yazan batıb günaha
Köçümü dünyadan çəkmişəm daha
Kim qalar bu boyda talan içində.

Açar sözlər: sevgi məhəbbət vəfasızlıq lirika lirik

Yazar: Xatirə Fərəcli | Tarix: İyun 1, 2008 21:14 | Bölməsiz | Şərhlər(0) | Baxış sayı: 89

QORU BU SEVGİDƏN MƏNİ, İLAHİ

Dəvətsiz qonağ tək döydü qapımı,
Arzu tək, fərağ tək döydü qapımı,
Tə'nə tək, qınağ tək döydü qapımı
Qoru bu sevgidən məni, ilahi.

Mələkmi, şeytanmı göylərdən enib,
Dönüb xoş nəğməyə könlümdə dinib,
Könül oğrusudur, qəlbimə girib
Qoru bu sevgidən məni, ilahi.

Qoydun sevgimə də qoruq-qadağa,
Baxdım ki, sığışmır yola-yolağa,
Olsun qınaqlara sevgim sadağa,
Qoru bu sevgidən məni, ilahi.

Açar sözlər: sevgi gözlənilməz eşq

Yazar: Xatirə Fərəcli | Tarix: İyun 1, 2008 21:08 | Bölməsiz | Şərhlər(0) | Baxış sayı: 88

SƏNİ GÖZLƏDİM

Kölgələnmiş aya döndüm,
Sıralandım, saya döndüm,
Toy – büsatdım, vaya döndüm,
Səni gözlədim.

Gəzən səda-soraq olub,
Gözü itmiş bulaq olub,
Yaxınlara uzaq olub
Səni gözlədim.

Ucalardan enmədin sən,
Daşa döndün dinmədin sən,
Nələr çəkdim… bilmədin sən…
Səni gözlədim.

Açar sözlər: sevgi intizar həsrət məşəqqət

Yazar: Xatirə Fərəcli | Tarix: İyun 1, 2008 21:06 | Bölməsiz | Şərhlər(0) | Baxış sayı: 90

Baharda sevmişdim səni...

Baharda sevmişdim səni
Səni də sevmişdim
baharı sevdiyim tək
arzularım
qönçə-qönçə,
çiçək-çiçək.
“baharda gələrəm”
demişdin
qoşulub gəlin bahara
baxışlarım
ağ göyərçin kimi
qondu yollara.
… daş bitirdi yolların
çəkdim gözümü
yerində dərdin qaldı
elə bildim
günahkar bahardı.

Açar sözlər: romantik şeirlər sevgi bahar

Yazar: Xatirə Fərəcli | Tarix: İyun 1, 2008 21:00 | Bölməsiz | Şərhlər(0) | Baxış sayı: 76